ريجيم دشتي

مسيكم بالخار
اخبار اعلوم,,بشرونا عنكم
عساكم اطويبين :>

في لقانا السابق وعدتكم اكتب عن ماساتي مع ريجيم دشتي
تعرفت على ريجيم دشتي في منتديات عالم حواء,,اشوف البنات يتكلمن عنه ويمدحنه,,اللي ناقصتن 10 واللي 20 كيلو,,قلت اجل هذا الريجيم السنع,,وادور على تلفون دشتي بس قالولي انه ماله عيادة,,بس له موقعن الكتروني يشرح فيه ريجيمه اللي مثل وجهه

هذا هو الموقع,,اضغطو هنا

لو تدشون هالموقع بتلقون ريجيمه وتوه فاتحن عيادته,,الله يعين اللي بيروحله,, المهم قالولي البنات في المنتدى انه في دكتورن اخر يمشي على نفس نظام دشتي والناس تمدحه,,اسمه دكتور يوسف بوعباس,,وانا اتصل على عيادته واحجز عقب اسبوع,,قلت مدام في زحمتن علاه اجل اكيد نظامه زان,,البنات في المنتدى نبهني جزاهن الله خار,,قالن تراه بيطلب منج تحليل دم وبياخذ فلوس زياده,,روحي المستاصف وسوي تحاليلج ببلاش وخذي النتيجة وروحيله احسن,,والله وروح المستاصف ثاني يوم وسوي تحاليلي واستلم النتيجة عقب جمن يوم والحمدلله تحاليلي زانه

واتصل على اختي غزوة اعلمها بعلومي,,هي ودها تنزل كمن كيلو بعد,,قالت اجل انا رايحتن معج وبندخل علاه من غير ما احجز وبشوف ريجيمه,,ان جازلي بمشي علاه,,والله ونروحله في ليلتن سوده ماطلع بها قمر,,وندخل علاهم وعطيهم التحاليل ويقيسون وزني وطولي وضغطي والدهون في جسمي وخصري,,كل هذا قبل لادش على الدكتور,,موعدنا 6 بس مادشينا علاه الا 7 ونص من الزحمة,,شوي ويطلع الدكتور بنفسه وينادي جوزة,,جان اقوم انا وغزوة اختي,,قال اي وحدة منكن جوزة؟ قلت انا جوزة وهذي اختي داخلتن معي,,والله ماجازله كلامي ويعفس وجهه وندخل علاه,,يحسبنا نب نحجز كل وحدتن لحالها,,قال تحاليلج زانه ياجوزة ويسألني شوية اسئلة ثمن طلع اوراق من درجه وقام يقول اول 3 اسابيع ياجوزة المسموحات هالشكل وهالشكل وهالشكل وهالشكل....الخ والممنوعات هالشكل وهالشكل..........الخ,,وانا فاتحن فمي انا وغزوة هذا كبره,,مهو معطينا فرصة انتكلم,,قتله يادكتور جبن قلاص عادي ناكله؟ قال صدقي او لاتصدقي ياجوزة عادي تاكلينة,,قلت البيبسي عادي؟ قال اي بس دايت,,قلت الله يجزاك خار جانك عيشتني احلامن وردية بس عساها تتحقق,,وانا انغز غزوة برجلي عشان تساله عن اللي في خاطرها,,بس مارضا,,قالها اسمحيلي ماقدر اجاوبج على شي من غير تحاليلج اللازمة,,ووصفلي حبوب تساعد على سد الشهية وفتامينات هذي صورة احبوبه المروحة:


انتم توحون اللي انا اوحيه؟ :> ايييه السعر 21 دينار لريديوستل لحاله,,والاخر الذهبي ب6دنانير,,المهم يوم خلصنا منه ولا يقول لازمج تحليل واحد ياجوزة الا وهو تحليل الغدة,,قلت لااا يادكتور وشهي غدته؟ انا امسيوتن كل التحاليل المطلوبة بالمستاصف,,قال لا انتي سويتي تحاليل الدم,,ويسحب مني دم ويعطيني موعد عقب 3 اسابيع,,ويطلع حسابي 60 دينار,,وانا اطالع غزوة بطرف عيني,,قلت للموظفة,,يحبيبتي شكله الدكتور غلطان وحاسبلي بدال شخصين,,يمكن لانه غزوة ادخلت معي,,بس تراه مافحصها ولاكتبلها شي,,قالت لا هذا احسابج لحاله,,سكت عنها مابغيت اجادلها,,كان في حريم واجد,,والله واعطيها الفلوس جعلهم يصرفونها على صحتهم وروح الجمعية اشتري اللي وصاني علاه ونا امعودتن البيت

المره الجايه بكتبلكم عن امضاعفات هالريجيم,,حسبي الله علاهم ونعم الوكيل

عشرة كيلوجرامات

مسيكم بالخار :>
اعلوكم عساكم اطويبين,,
انا اليوم بتكلم عن ماساتن صارلها معي مدتن مهي ببسيطة,,الا وهي عشرة كيلوجرامات,,جربت مختلف انواع الريجيمات,,انهن يروحن هالعشر كيلوجرامات؟ ابدن,,اني انزل حتى لو نصهن؟ اببببدن,,انا منيب متينه بس ابا يكون طولي امناسب لوزني,,الوزن المثالي على مايقولون,,
بديت مع الطب الشعبي,,وشريت عشبة العجب العجاب من ام حسين,,جانكم سمعتو بها,,تكتب بجريدة النحلة,,المهم يقولون اتضعف بسرعة,,وام حسين بنفسها امدحتلي بذالعشبة وخلتني اعيش احلامن وردية وقلت خلاص اشتريها ومهو ببسيط سعرها والله,,حول ال30 دينار,,جربتها لمدة شهر,,بس والله مافادتني وتصلت على ام حسين ومعافر انا وياها انها تردلي بيزاتي,,اجل اتقص علي وسكت عنها! ولا رضت وفرت مخي وقصت علي وقالتلي اشتري الخلطة الملكية للتبييض وبخصملج فيها خصمن زين ولا يهمج يا ام انوير,,وشريت الخلطة,,والله مزين منها الخلطة وتبيض,,بس تتفخ الوجه,,وينتفخلكم وجهي ويصير هذا كبره,,ودق علاها وقولها ابج انا اوله طالبتن العشبة عشان اضعف ونتي تعطيني هالكريم اللي يتفخني,,اشوه اني مادهنت جسمي كله فيه جان الباب مادش منه,,حاطتن دوبج دوبي ليه يا ام حسين؟ وش انا امسويتن الج؟فضحتيني قدام رجلي حسبي الله علاج,,قالت لااا يتهايلج انه يتفخ,,وجهج من نوره اتحسين انه كبر,,قلتلها لااا وجهي واعرفه زان,,متفوخ عساج ماتشوفينه,,شكله الكريم فيه كارتيزون يام ام حسين اعترفي,,هو صحيح فيه كارتزون؟ ترى الله فوقج,, وهي تصيح وتحلف وتقول لا كله طبيعي والكيماويات ماقربها ووو من هالحجي,,قالت اجل يبالج مضعف الوجه السحري,,وهي تفر راسي مرتن ثانيه واشتري منها هالمضعف اللي يصفقلكم وجهي ويصير ذبلانن تقل عمري بالستين,,حسبي الله علاج يا ام حسين جانج لاعبتن فيني و مابقا شي ماجربتيه,,عقبن قلت ماني داقتن علاها,,اخاف تفر مخي بعد,,شكل اعشابها مسحوره,,تسحر زباينها جعل الله يرد سحرها وكيدها في نحرها,,ودق على الجريدة اللي تكتب بها,,وقولهم عطوني المدير,,قالو ليه وشتبين به؟خير عسى ماشر؟ قلت خير ولا شر ماعلاكم ,,ابا المدير شخصين وكلامي معه هو فقط,,انا انسانه تاذيت من جريدتكم,,قالو المدير مهب بموجود انحولج عالمساعد,,و يقعد المساعد يمدح في ام حسين وفي مصداقيتها وانه جريدتهم ماتنشر اي شي مهب ذا مصداقية عشان سمعتهم,,والقراء يدزون رسايل يشكرون في وصفات ام حسين,, قلتله جريدتكم كلها اشاعات وشكلها ام حسين ساحرتك انت بعد,,قال عفوا؟ قلت ايه ساحرتك,,وهو يروح فكره بعيد,,يحسب اني اقصد انه امصاحبها والعياذ بالله,,وينتفض ويدافع عن عمره و من هالحجي,,قلت هذي والله النشبة,,مهي اببعيدة يرفع علي قضية سب وقذف اموظف في وظيفته,,قلت خلصت؟ قال اختي هذا مهوب باسلوب,,قلت الله يلعن الساعه اللي شريت فيها جريدتكم وتصلت علاكم وعلى ام حسين حقتكم وجعلك تلاقيها في اعيالك وتفلس جريدتكم الصفرا,,وانا اسده في وجهه :>

وعقبن بدت ماساتي مع ريجيم دشتي,,ونشالله المرة الجاية اكتبلكم عنه

املاحظة :>

مسيكم بالخار

شعلوكم,,بشرونا عنكم :>

انا عندي املاحظة لاحظتها في كثير من المدونات الكويتية وهي التالي:

ليه مغير يكتبون بالانجليزي؟ ليه محنا عرب وكويتيين وجاويد نفتخر بعروبتنا؟

هو صحيح انه الانجليزي لغتن مطلوبة ولابد كل واحد يتعلمها,,بس مهوب دايم عاد

اجل امس سيرت على كذا امدونة ولا فهمت شي! حتى الانجليزي اللي درسناه بالمدرسة مالقيته فذالمدونات

وكان ودي اشارك معهم وخطرتلي فكره:>

في موقع الكتروني يترجم الموقع كله مرتن وحده,,وهذا اسم الموقع للي يحب يستفيد منه

هذا هو الموقع,,اضغطو هنا


شسوي ماكان ودي بس حديتوني علاه
وترجمته مزين منها,,هو صحيح يخوره بس الواحد يفهم زبدة الكلام
شي احسن من لاشي

بس عاد مهب عشان لقيت امترجم خلاص تكتبون انجليزي,,لا نوعو جزاكم الله خير,,مرتن انجليزي وعشر مرات عربي
:>

اخيرن

مابغينا,صارلي كمن يوم اعوبل بهالمدونه يالله عرفتلها
يالله انك تحييهم:>
على بركة الله